- ప్రజా ఆయుధం దినపత్రిక
జల జీవన్ మిషన్తో రాజోలు నియోజకవర్గంలో త్రాగునీటి సమస్యలకు శాశ్వత పరిష్కారం
రాజోలు, ఏప్రిల్ 9:
రాజోలు నియోజకవర్గంలోని సఖినేటిపల్లి మండలంలో జల జీవన్ మిషన్ కింద రూ.17 కోట్ల 33 లక్షల వ్యయంతో అంతర్వేదిలో నిర్మించిన సురక్షిత త్రాగునీటి సరఫరా పథకాన్ని రాష్ట్ర ఉప ముఖ్యమంత్రి కొణిదెల పవన్ కళ్యాణ్, జిల్లా ఇన్చార్జ్ మంత్రి కె అచ్చెన్నాయుడు అమరావతి నుంచి దూరవీక్షణ విధానంలో గురువారం ప్రారంభించారు.
అదేవిధంగా మలికిపురం మండలంలోని గుడిమెళ్లంకలో రూ.5 కోట్ల నిధులతో చేపట్టనున్న సురక్షిత త్రాగునీటి పథకానికి సంబంధించిన వేగవంతమైన ఇసుక వడపోత నిర్మాణానికి శంకుస్థాపన చేశారు.
ఈ సందర్భంగా జిల్లా కలెక్టర్ ఆర్ మహేష్ కుమార్ మాట్లాడుతూ అంతర్వేది, గొంది, పల్లిపాలెం, అంతర్వేదికర గ్రామాలకు ఈ పథకం ద్వారా సురక్షిత త్రాగునీటి సరఫరా అందుతుందని తెలిపారు. మొత్తం 13 ఆవాసాల్లోని 4,522 గృహాలకు త్రాగునీరు సమృద్ధిగా అందుతుందని చెప్పారు. మొదటి దశలో అంతర్వేది, పల్లిపాలెం గ్రామాలకు నీటి సరఫరా ప్రారంభమవుతుందని, రెండో దశలో అంతర్వేదికర, గొంది గ్రామాల్లో మూడు నెలల్లో పనులు పూర్తి చేసి నీరు అందజేస్తామని వెల్లడించారు.
ఈ రెండు దశలు పూర్తయ్యాక ప్రస్తుతం అరకొరగా ఉన్న నీటి సరఫరా వ్యవస్థ మెరుగుపడి మొత్తం 67 గ్రామాలకు సమృద్ధిగా నీరు అందుతుందని తెలిపారు. గుడిమెళ్లంక సంరక్షిత త్రాగునీటి పథకం పూర్తయితే సుమారు 30 గ్రామాల్లోని 97 ఆవాసాలకు చెందిన 1,27,000 గృహాలకు ఇంటింటికీ త్రాగునీటి కలయికలు అందుతాయని చెప్పారు.
స్థానిక ఎమ్మెల్యే దేవ వరప్రసాద్ మాట్లాడుతూ కూటమి ప్రభుత్వం ఇచ్చిన హామీ మేరకు నియోజకవర్గంలో త్రాగునీటి సదుపాయాలు మెరుగుపడుతున్నాయని తెలిపారు. గత దశాబ్దంగా 60 గ్రామాల్లో త్రాగునీటి సమస్యలు ఉన్నాయని, ముఖ్యంగా తీర ప్రాంతంలోని 20 గ్రామాలు తీవ్రమైన ఇబ్బందులు ఎదుర్కొన్నాయని గుర్తుచేశారు. గొంది గ్రామంలో ప్రజలు గోతులు తీసుకుని నీటిని వడకట్టి వినియోగించుకునే పరిస్థితి ఉండేదని తెలిపారు.
జల జీవన్ మిషన్ ద్వారా గ్రామీణ ప్రజల ఆరోగ్య ప్రమాణాలు మెరుగుపడతాయని, ప్రతి ఇంటికి నేరుగా పైపు ద్వారా రోజుకు కనీసం 55 లీటర్ల నాణ్యమైన త్రాగునీరు అందించడం లక్ష్యమని చెప్పారు.
స్థానిక నాయకురాలు గొల్లపల్లి అమూల్య మాట్లాడుతూ ఎమ్మెల్యే దేవ వరప్రసాద్ నియోజకవర్గంలో త్రాగు, సాగునీటి సరఫరాపై ప్రత్యేక శ్రద్ధ తీసుకుంటున్నారని పేర్కొన్నారు.
ఈ కార్యక్రమంలో గ్రామీణ నీటి సరఫరా విభాగం అధికారులు, విభాగ ఇంజనీర్లు మారుతీరావు, రాజకీయ నాయకులు, ఎంపీటీసీలు, జడ్పీటీసీలు తదితరులు పాల్గొన్నారు.
