ప్రజా సమస్యల పరిష్కార వేదిక వద్ద చలివేంద్రం ఏర్పాటు

ప్రజా ఆయుధం దినపత్రిక

ప్రజా సమస్యల పరిష్కార వేదిక వద్ద చలివేంద్రం ఏర్పాటు

ప్రజా ఆయుధం అమలాపురం, ఏప్రిల్ 27:వేసవి తీవ్రత దృష్ట్యా ప్రజలకు ఉపశమనం కలిగించేందుకు డాక్టర్ బి.ఆర్. అంబేద్కర్ కోనసీమ జిల్లా కలెక్టరేట్‌లో ప్రజా సమస్యల పరిష్కార వేదిక వద్ద ఉచిత మజ్జిగ పంపిణీతో కూడిన చలివేంద్రాన్ని సోమవారం ఏర్పాటు చేశారు.

ఈ చలివేంద్రాన్ని జిల్లా కలెక్టర్ ఆర్. మహేష్ కుమార్, జాయింట్ కలెక్టర్ వైఖోం నిధియా దేవి, జిల్లా ఎస్పీ రాహుల్ మీనా ప్రారంభించారు. ఈ సందర్భంగా కలెక్టర్ మాట్లాడుతూ, అమలాపురం రూరల్ మండలం చింతాడగరువు ఎంపీటీసీ మోటూరి కనకదుర్గ – వెంకటేశ్వరరావు దంపతులు మానవతా దృక్పథంతో ఈ సేవా కార్యక్రమాన్ని చేపట్టడం అభినందనీయమన్నారు.

ఎండ తీవ్రతలో సుదూర ప్రాంతాల నుండి సమస్యల పరిష్కారం కోసం కలెక్టరేట్‌కు వచ్చే ప్రజలకు, ముఖ్యంగా వృద్ధులు, మహిళలకు ఈ చలివేంద్రం ఎంతో ఉపయుక్తంగా ఉంటుందని తెలిపారు. కేవలం సమస్యలు వినడమే కాకుండా, ప్రజలకు కనీస సౌకర్యాలు కల్పించడం కూడా పరిపాలనలో భాగమని పేర్కొన్నారు.

ప్రతి సోమవారం నిర్వహించే ప్రజా సమస్యల పరిష్కార వేదికకు భారీగా ప్రజలు హాజరవుతారని, ఇలాంటి సందర్భాల్లో దాతలు ముందుకు వచ్చి చల్లని మజ్జిగ, తాగునీరు అందించడం సమాజానికి మంచి సందేశం ఇస్తుందని అన్నారు. సమాజం పట్ల బాధ్యతతో ముందుకు వచ్చిన దాతల సేవా భావం ఇతరులకు స్ఫూర్తిగా నిలుస్తుందని కొనియాడారు.

చలివేంద్రంలో పంపిణీ చేసే మజ్జిగ, తాగునీరు పరిశుభ్రతతో సిద్ధం చేయాలని, నాణ్యత విషయంలో ఎలాంటి రాజీ ఉండకూడదని దాతలకు సూచించారు. ప్రజల ఆరోగ్యం దృష్ట్యా పరిశుభ్రతకు ప్రాధాన్యం ఇవ్వాలని స్పష్టం చేశారు.

ప్రజలు ఎండ తీవ్రతను దృష్టిలో ఉంచుకుని తగిన జాగ్రత్తలు తీసుకోవాలని, అత్యవసరమైతే తప్ప మధ్యాహ్న వేళల్లో బయట తిరగవద్దని విజ్ఞప్తి చేశారు. వేసవికాలంలో మరింత మంది దాతలు ముందుకు వచ్చి ప్రధాన కూడళ్ళు, జనసంచారం అధికంగా ఉన్న ప్రాంతాల్లో చలివేంద్రాలు ఏర్పాటు చేయాలని ఆకాంక్షించారు.

చలివేంద్రం నిర్వహణకు ముందుకు వచ్చిన మోటూరి కనకదుర్గ – వెంకటేశ్వరరావు దంపతులకు కలెక్టర్ హృదయపూర్వక కృతజ్ఞతలు తెలిపారు.