మహిళా బిల్లు ఆమోదం వరకు పోరాటం ఆగదు – ఎమ్మెల్యే అయితాబత్తుల ఆనందరావు

ప్రజా ఆయుధం దినపత్రిక

మహిళా బిల్లు ఆమోదం వరకు పోరాటం ఆగదు – ఎమ్మెల్యే అయితాబత్తుల ఆనందరావు

ప్రజా ఆయుధం అమలాపురం, ఏప్రిల్ 27:

మహిళా రిజర్వేషన్ బిల్లును అడ్డుకోవడం మహిళల పట్ల తీవ్రమైన అన్యాయమని, బిల్లు ఆమోదం పొందే వరకు పోరాటం ఆగదని అమలాపురం ఎమ్మెల్యే అయితాబత్తుల ఆనందరావు అన్నారు.

సోమవారం అమలాపురం పట్టణంలో మహిళలు నిర్వహించిన భారీ ర్యాలీ మరియు జన ఆక్రోశ మహిళా సమ్మేళనం కార్యక్రమంలో ఆయన ముఖ్య అతిథిగా పాల్గొన్నారు. ఈ ర్యాలీ మెట్ల రమణబాబు నివాసం నుండి ప్రారంభమై స్థానిక గడియార స్తంభం వరకు సాగింది.

ఈ సందర్భంగా ఎమ్మెల్యే మాట్లాడుతూ, మహిళల సంక్షేమానికి కాంగ్రెస్ పార్టీ ఎప్పుడూ కట్టుబడి లేదని, పార్లమెంట్‌లో మహిళా బిల్లును అడ్డుకోవడం ద్వారా వారి అసలు వైఖరి బయటపడిందని విమర్శించారు. మహిళలకు సమాన హక్కులు కల్పించే విషయంలో కొన్ని పార్టీల ద్వంద్వ వైఖరిని ప్రజలు గమనిస్తున్నారని పేర్కొన్నారు.

అలాగే మహిళల సాధికారతలో గతంలో చేపట్టిన పలు నిర్ణయాలను ప్రస్తావిస్తూ, స్థానిక సంస్థల్లో మహిళలకు రిజర్వేషన్లు కల్పించడం, మహిళల ఆర్థిక స్వావలంబన కోసం పలు కార్యక్రమాలు అమలు చేయడం వంటి అంశాలను గుర్తుచేశారు. మహిళలను అన్ని రంగాల్లో ముందుకు తీసుకెళ్లేందుకు రాజకీయ సంకల్పం అవసరమని ఆయన తెలిపారు.

మహిళలకు చట్టసభల్లో 33 శాతం రిజర్వేషన్ కల్పించే మహిళా బిల్లు ఆమోదం పొందే వరకు ఉద్యమం కొనసాగుతుందని, ప్రతి గ్రామం, ప్రతి వీధిలో ఈ అంశంపై అవగాహన పెంచాలని పిలుపునిచ్చారు. మహిళల హక్కుల కోసం ఐక్యంగా నిలబడాల్సిన అవసరం ఉందని అన్నారు.

ఈ కార్యక్రమంలో వందలాది మంది మహిళలు పాల్గొని తమ అభిప్రాయాలను వ్యక్తం చేస్తూ నిరసన తెలిపారు. మహిళా బిల్లుకు మద్దతుగా నినాదాలు చేస్తూ ర్యాలీ విజయవంతం చేశారు.