ప్రజా ఆయుధం దినపత్రిక
కేంద్ర సహాయ మంత్రి జయంత్ చౌదరిని కలిసిన ఎంపీ హరీష్ బాలయోగి
న్యూఢిల్లీ, ఏప్రిల్ 18: కేంద్ర విద్యాశాఖ సహాయ, నైపుణ్యాభివృద్ధి మరియు వ్యవస్థాపక శాఖ మంత్రి జయంత్ చౌదరిని అమలాపురం పార్లమెంట్ సభ్యుడు గంటి హరీష్ బాలయోగి మర్యాదపూర్వకంగా కలిశారు. ఢిల్లీలోని మంత్రి కార్యాలయంలో ఈ భేటీ జరిగింది.
ఈ సందర్భంగా అమలాపురం పార్లమెంట్ పరిధిలోని యువతకు విద్యా మరియు నైపుణ్యాభివృద్ధి అవకాశాలను మరింత బలోపేతం చేసే అంశాలపై చర్చించారు. ముఖ్యంగా స్కిల్ డెవలప్మెంట్ సెంటర్లు ఏర్పాటు, వృత్తి విద్యను ప్రోత్సహించడం, స్థానిక అవసరాలకు అనుగుణంగా శిక్షణ కార్యక్రమాలు చేపట్టడం వంటి అంశాలను మంత్రి దృష్టికి తీసుకువెళ్లారు.
అలాగే గ్రామీణ ప్రాంత యువతకు ఉపాధి అవకాశాలు పెంచేందుకు కేంద్ర ప్రభుత్వ పథకాలను మరింత విస్తృతంగా అమలు చేయాల్సిన అవసరం ఉందని ఎంపీ వివరించారు. నూతన సాంకేతిక పరిజ్ఞానంపై శిక్షణ అందించడం ద్వారా యువతను ఉద్యోగావకాశాలకు సిద్ధం చేయాలని సూచించారు.
ఈ విషయాలపై సానుకూలంగా స్పందించిన కేంద్ర మంత్రి జయంత్ చౌదరి, అమలాపురం పార్లమెంట్ పరిధిలో స్కిల్ డెవలప్మెంట్ కార్యక్రమాలను బలోపేతం చేసేందుకు అవసరమైన చర్యలు తీసుకుంటామని హామీ ఇచ్చినట్లు ఎంపీ హరీష్ బాలయోగి తెలిపారు.
ఈ భేటీ ద్వారా ప్రాంతీయ యువతకు విద్యా, ఉపాధి రంగాల్లో మరింత ప్రోత్సాహం లభించే అవకాశాలు ఉన్నాయని ఎంపీ ఆశాభావం వ్యక్తం చేశారు.
